საიტი მუშაობს სატესტო რეჟიმში

აზერბაიჯანის დელეგაციის წევრები ტყითსარგებლობის მოდელს გაეცნენ

აზერბაიჯანის რესპუბლიკის ეკოლოგიისა და ბუნებრივი რესურსების სამინისტროს დელეგაციის წევრები, საქართველოში ვიზიტის ფარგლებში, მცხეთა-მთიანეთის რეგიონში,  ლისის „საქმიან ეზოში“ იმყოფებოდნენ.  დელეგაციის წევრებს საქართველოში მიმდინარე სატყეო რეფორმებსა და  ტყითსარგებლობის წესის შესახებ ინფორმაცია გარემოს დაცვისა და სოფლის მეურნეობის მინისტრის მოადგილემ, კახა კაკაბაძემ გააცნო. „აზერბაიჯანელ კოლეგებს  ტყითსარგებლობის   მოდელი  გავაცანით. ვფიქრობთ, ქვეყნის მასშტაბით მოწყობილი  „საქმიანი ეზოების” ფუნქციონირება მნიშვნელოვნად შეამცირებს  ტყეზე უარყოფით ზეწოლას და, რაც ყველაზე მნიშვნელოვანია, მოსახლეობას ექნება გამარტივებული წვდომა საშეშე მერქანზე”, - აღნიშნა გარემოს დაცვისა და სოფლის მეურნეობის მინისტრის მოადგილემ, კახა კაკაბაძემ.აღსანიშნავია, რომ ახალი სატყეო კოდექსის მიღების შემდეგ, ინტენსიურად მიმდინარეობს სატყეო რეფორმა, რომლის ფარგლებში ე.წ. „საქმიანი ეზოები“ საქართველოს ყველა მუნიციპალიტეტშია მოწყობილი.  „საქმიანი ეზო“ უზრუნველყოფს მოსახლეობის მერქნული რესურსით მომარაგებას.  ქვეყნის მასშტაბით უკვე მოწყობილია  30  „საქმიანი ეზო”.  სამუშაოები მიმდინარეობს 9 „საქმიანი ეზოს“ მოწყობისთვის, რომელიც წლის ბოლომდე დასრულდება. ეროვნული სატყეო სააგენტოს ინიციატივით, 2023 წელს, დამატებით, 17 „საქმიანი ეზოს“ მოწყობა იგეგემება.  შედეგად, მერქნული რესურსის დამზადების მიზნით ტყითსარგებლობა გაცილებით ეფექტიანად განხორციელდება,  შემცირდება უკანონო ჭრები. სააგენტოს კიდევ უფრო მოდერნიზება და თანამედროვე ტექნიკით აღჭურვა განსაკუთრებით მნიშვნელოვანია საქმიანობის ეფექტიანი განხორციელებისთვის.  „ორ ქვეყანას შორის გარემოს დაცვის სფეროში სამომავლო თანამშრომლობის  პრიორიტეტულ  მიმართულებებს შორისაა ტყის მდგრადი მართვის გამოცდილების გაზიარება. ყველა ის რეფორმა, რომელიც სატყეო სექტორში ხორციელდება, ტყის მდგრადი მართვის ჩამოყალიბებას უწყობს ხელს. აზერბაიჯანშიც გვაქვს „საქმიანი ეზოს” მსგავსი მოდელი და თუ ჩვენი მეტყევეები ჩამოვლენ საქართველოში, გაეცნობიან აქაურ პრაქტიკას, რა თქმა უნდა, მნიშვნელოვანი იქნება მომავალი თანამშრომლობისთვის”, - აღნიშნა აზერბაიჯანის ეკოლოგიისა და ბუნებრივი რესურსების მინისტრმა, მუხთარ ბაბაევმა.გარემოს დაცვისა და სოფლის მეურნეობის სამინისტროს მიზანია, სოციალური ჭრა სატყეო სააგენტოს ისეთმა სერვისებმა ჩაანაცვლოს, რომელიც უფრო მეტად კომფორტული იქნება  მერქნული რესურსით მოსარგებლეებისთვის.

იხილეთ სრულად

ანიმაციური ფილმი "ტყე ჩემი მეგობარია"

„ტყე ჩემი მეგობარია”- ანიმირებული მანგას პრემიერა  კინოთეატრ „ამირანში”  გაიმართა.  ადამიანსა და ბუნებას შორის ჰარმონიასა და მშვიდობაზეა  აგებული ახალი ანიმაციური ფილმის სიუჟეტი გაეროს განვითარების პროგრამის (UNDP), იაპონიის საელჩოსა და ეროვნული სატყეო სააგენტოს მხარდაჭერით შეიქმნა.  ანიმაციის პრემიერას ეროვნული სატყეო სააგენტოს უფროსის მოადგილე ნათია იორდანიშვილი,  UNDP-ის მუდმივი წარმომადგენელი საქართველოში ნიკ ბერესფორდი და იაპონიის ელჩი  საქართველოში, იმამურა აკირა ესწრებოდნენ. ანიმაციური ფილმი „ტყე ჩემი მეგობარია“ აგებულია  კლასიკური იაპონური მანგას მოდელზე.  მასში მოთხრობილია ფანტასტიკური მძაფრსიუჟეტიანი ამბავი საკუთარი თავის ძიებაზე, ბრძოლასა და მეგობრობაზე. ანიმაცია ქართულმა არასამთავრობო ორგანიზაციამ „დემოკრატიის ლაბორატორია“ გაეროს განვითარების პროგრამის დაკვეთით გადაიღო. ფილმი ფართომასშტაბიანი საინფორმაციო კამპანიის ნაწილია, რომელიც ტყის დაცვასა და მდგრად მართვას ემსახურება.„საქართველოს მთავრობა მნიშვნელოვან ნაბიჯებს დგამს ტყის მდგრადი მართვის მიმართულებით. გარემოსდაცვითი ცნობიერება და განათლება ამ საქმიანობის მნიშვნელოვანი ნაწილია. ადამიანებს უნდა ჰქონდეთ შესაძლებლობა, იმსჯელონ გარემოსდაცვით საკითხებზე და თავად ჩაერთონ პრობლემების მოგვარებაში“, - აღნიშნა ეროვნული სატყეო სააგენტოს უფროსის მოადგილემ ნათია იორდანიშვილმა. „იაპონიაში მანგა ყველა ასაკის ადამიანს უყვარს. მოხარული ვარ, რომ ჩვენი კულტურის ეს უნიკალური ნაწილი საქართველოს ტყეების დაცვის, ემისიების შემცირებისა და კლიმატის ცვლილების შერბილების საქმეს წაადგება“, - განაცხადა იაპონიის ელჩმა საქართველოში, იმამურა აკირამ. „მსოფლიოს ისე ვერ შევცვლით, თუ ჯერ საკუთარი თავი არ შევცვალეთ. ეს რთული გზა იმის გაცნობიერებით იწყება, თუ როგორ უნდა მივიდეთ უცოდინრობიდან ცნობიერებამდე, ბუნების დაუფიქრებელი ექსპლოატაციიდან ბუნებრივი რესურსების მდგრად გამოყენებამდე, კლიმატის ცვლილების კატასტროფიდან მწვანე და უსაფრთხო მომავლამდე. UNDP ხელს უწყობს კლიმატგონივრული განვითარების ამ საბაზისო პრინციპების გავრცელებასა და განხორციელებას. მოხარულები ვართ, რომ ამ საქმეში სხვადასხვა პარტნიორსა და მხარდამჭერთან ვთანამშრომლობთ, მათ შორის, იაპონიასთან, რათა ჩვენი სათქმელი მთელ საქართველოს გავაგებინოთ“, - აღნიშნა ნიკ ბერესფორდმა, UNDP-ის მუდმივმა წარმომადგენელმა საქართველოში. პირველი ჩვენების შემდეგ, მანგა საქართველოს სოფლებში გაემგზავრება, სადაც სკოლის მოსწავლეებისა და ახალგაზრდობისთვის კინოჩვენება და დისკუსიები გაიმართება.

იხილეთ სრულად