რეგიონული სატყეო სამსახურების 6 თვის ანგარიში

გარემოს დაცვისა და სოფლის მეურნეობის მინისტრის მოადგილე კახა კაკაბაძე რეგიონული სატყეო სამსახურების ხელმძღვანელებს შეხვდა და შესრულებული სამუშაოების 6 თვის ანგარიში მოისმინა.ეროვნული სატყეო სააგენტო ქვეყანაში ტყის მართვის ძირითადი ორგანოა, რომლის პრიორიტეტული მიმართულებებია ტყის აღდგენა, ტყეების სანიტარიული მდგომარეობის გაუმჯობესება, ტყის ინვენტარიზაცია და მართვის გეგმების მომზადება. აღნიშნულ სატყეო ღონისძიებებს, დარგობრივი დეპარტამენტების წარმომადგენლებთან ერთად, 9 რეგიონული სატყეო სამსახურის თანამშრომლები ახორციელებენ.ტყის ახალი კოდექსის ეფექტიანი აღსრულების ხელშეწყობის, მოსახლეობისა და კერძო სექტორის მერქნულ რესურსზე ხელმისაწვდომობის გამარტივებისა და სატყეო მეურნეობის განვითარების მიზნით, საქართველოს რეგიონებში მოწყობილია 55 „საქმიანი ეზო“, ხოლო 2024 წლის ბოლომდე 16 „საქმიანი ეზო“ მოეწყობა.ტყის ინვენტარიზაციის სამუშაოების შედეგად, ინფორმაცია სრულად განახლებულია სააგენტოს მართვას დაქვემდებარებული 700 ათას ჰა-ზე მეტი ფართობისთვის და მომზადებულია ტყის მართვის ათწლიანი გეგმები. მიმდინარე პერიოდში, ტყის აღრიცხვის სამუშაოები მიმდინარეობს საქართველოს 4 რეგიონის 6 სხვადასხვა მუნიციპალიტეტში (ყვარელი, თელავი, თიანეთი, ონი, ცაგერი, ოზურგეთი) სულ - 265843 ჰა ფართობზე, რომლის დასრულების შემდეგ, მომავალი 10 წლისთვის შემუშავდება ტყის მართვის გეგმები. ტყის ინვენტარიზაციის სამუშაოებისთვის კვალიფიციური ახალგაზრდა კადრის მომზადებისთვის, სააგენტომ შეიმუშავა მიზნობრივი სამთვიანი პროგრამა. 2019-2024 წლებში გადამზადდა სატყეო განათლების მქონე 62 ახალგაზრდა, რომლებიც ტყის ინვენტარიზაციის სამუშაოებზე დასაქმდა.ეროვნული სატყეო სააგენტოს მიერ, მომზადდა ტყის აღდგენის გრძელვადიანი გეგმა, რომლის მიხედვითაც, 2030 წლამდე ტყის აღდგენის სამუშაოები 20 000 ჰა ფართობზე განხორციელდება. 2024 წლის ბოლომდე, ტყის აღდგენის ღონისძიებები 2286 ჰა ფართობზე იმერეთში, შიდა ქართლში, ქვემო ქართლში, გურიაში, რაჭა-ლეჩხუმ ქვემო სვანეთსა და კახეთში განხორციელდება.რაც შეეხება სამართალდარღვევის სტატისტიკას, 2024 წლის იანვრიდან ივნისის თვის ჩათვლით, ეროვნული სატყეო სააგენტოს თანამშრომლების მიერ, ჯამში, ქვეყნის მასშტაბით ხე-ტყის უკანონო მოპოვებისა და ტრანსპორტირების 436 ფაქტია გამოვლენილი; „საქმიან ეზოებში“ დასაწყობებული რესურსის მოცულობამ 355,91 კუბური მეტრი შეადგინა.მნიშვნელოვანია აღინიშნოს, რომ ეროვნული სატყეო სააგენტოს მართვას დაქვემდებარებულ სახელმწიფო ტყის მთელ პერიმეტრზე განთავსებულია ფოტოხაფანგები. სატყეო სამსახურის თანამშრომლები პატრულირებას ახორცილებენ დრონების საშუალებითაც, რაც ბუნებრივი რესურსებით უკანონო სარგებლობის გამოვლენის ეფექტიანი საშუალებაა. 

იხილეთ სრულად

საკემპინგე და საპიკნიკე ადგილები ადიგენის მუნიციპალიტეტში

ადიგენის მუნიციპალიტეტში, სოფელ მოხეში, პროექტის - „ტყის მდგრადი მართვა ადიგენის მუნიციპალიტეტში, ფაზა II“ ფარგლებში, ეკოტურისტული ინფრასტრუქტურა - საპიკნიკე და საკემპინგე ადგილი მოეწყო. პროექტის ფინანსური მხარდამჭერია საქართველოში სლოვენიის რესპუბლიკის საერთაშორისო თანამშრომლობისა და განვითარების ცენტრი (CMSR). სლოვენიური პრაქტიკის გათვალისწინებით, სოფელ მოხეში მდებარე ჩანჩქერების კასკადს ახალი საფეხმავლო ბილიკიც დაემატა.აღსანიშნავია, რომ მიმდინარე წელს, პროექტის ფარგლებში დაგეგმილია კიდევ ორი სარეკრეაციო ინფრასტრუქტურის და ერთი საზაფხულო ბანაკის მოწყობა. პროექტი „ტყის მდგრადი მართვა ადიგენის მუნიციპალიტეტში“ სლოვენიის მთავრობის ფინანსური მხარდაჭერით, მსოფლიო ბუნების ფონდის (WWF) კავკასიის პროგრამის და ზავიტა კონსალტინგის კონსორციუმის მიერ ხორციელდება. „სლოვენიის მთავრობის ფინანსური მხარდაჭერით, ადიგენის მუნიციპალიტეტში მნიშვნელოვანი პროექტი ხორციელდება. ტურისტული ინფრასტრუქტურის განვითარება და ტყის მრავალმიზნობრივი გამოყენება სააგენტოს ერთ-ერთი პრიორიტეტული მიმართულებაა. მოსახლეობის საშეშე რესურსზე ხელმისაწვდომობის გამარტივების მიზნით, ასევე, ხანძარსაწინააღმდეგო პრევენციული ღონისძიებებისთვის, მიმდინარე წელს დაგეგმილია სლოვენიური პრაქტიკის გათვალისწინებით სატყეო გზების მოწყობა-რეაბილიტაციაც“, - აღნიშნა ეროვნული სატყეო სააგნეტოს უფროსმა კახა ცერცვაძემ. აღნიშნული პროექტის ძირითადი მიზნები ადიგენის მუნიციპალიტეტში ტყეების მდგრადი მართვის გაძლიერებაა. პროექტის მთლიანი ბიუჯეტი 1,099,940 ევროს შეადგენს, სადაც ეროვნული სატყეო სააგენტოს კონტრიბუცია 551,500 ევროა, ხოლო 548,440 ევრო საგრანტო თანხა. ღონისძიებას გარემოს დაცვისა და სოფლის მეურნეობის სამინისტროს წარმომადგენლებთნ ერთად, ადგილობრივი თვითმმართველობის წარმომადგენლები ესწრებოდნენ.

იხილეთ სრულად

ტყის ინვენტარიზაციის სამუშაოები GCF პროექტის ფარგლებში

ოზურგეთის მუნიციპალიტეტში ტყის ინვენტარიზაციის სამუშაოები ჯამში 19300 ჰა ფართობზე განხორციელდება. ოზურგეთის მუნიციპალიტეტში სტატისტიკური მეთოდით ტყის ინვენტარიზაციის (FMI) საველე სამუშაოები ივნისის თვეში დაიწყო და  მიმდინარე წლის ნოემბერში დასრულდება.  ინვენტარიზაციას ეროვნული სატყეო სააგენტოსა და გარემოსდაცვითი ინფორმაციისა და განათლების ცენტრის სასწავლო პროგრამის ფარგლებში გადამზადებული მეტყევე ტაქსატორები ახორციელებენ.ოზურგეთში ტყის ინვენტარიზაცია, კლიმატის მწვანე ფონდის (GCF) მიერ დაფინანსებული პროექტის - ECO Georgia ფარგლებში, ეროვნულ სატყეო სააგენტოსა და გერმანიის საერთაშორისო თანამშრომლობის საზოგადოება (GIZ) შორის გაფორმებული საგრანტო ხელშეკრულების ფარგლებში ხორციელდება.საველე სამუშაოების დაწყებამდე, ტყის ინვენტარიზაციის მნიშვნელობის და ტყითსარგებლობასთან დაკავშირებული საკითხები ეროვნული სატყეო სააგენტოს ხელმძღვანელებმა ოზურგეთის მუნიციპალიტეტის მერიისა და ადგილობრივი თვითმმართველობის წარმომადგენლებთან გამართულ შეხვედრაზე განიხილეს.

იხილეთ სრულად

ხე-ტყის უკანონო მოპოვებისა და ტრანსპორტირების ივნისის თვის სტატისტიკა

გარემოს დაცვისა და სოფლის მეურნეობის სამინისტროს სსიპ ეროვნული სატყეო სააგენტოს რეგიონული სატყეო სამსახურების თანამშრომლებმა, მიმდინარე წლის ივნისის თვეში, ქვეყნის მასშტაბით, ხე-ტყის უკანონო მოპოვებისა და ტრანსპორტირების 61  ფაქტი გამოავლინეს. ხე-ტყის უკანონოდ მოპოვების ფაქტებიდან 11  სამართალდარღვევა გამოვლინელია კახეთის სატყეო სამსახურის თანამშრომლების მიერ, 19 - ქვემო ქართლის, 8 ფაქტი გამოვლენილია შიდა ქართლის, 7 - სამცხე-ჯავახეთის, 11 - გურიისა და  5 - იმერეთის სატყეო სამსახურის თანამშრომლების მიერ.  ჯამში  ამოღებულია უკანონოდ მოპოვებული, სხვადასხვა სახეობის 56,639 კუბურ მეტრამდე ხე-ტყე, რომლებიც სააგენტოს „საქმიან ეზოებში“ დასაწყობდა.ამასთანავე, ეროვნული სატყეო სააგენტოს თანამშრომლებმა, გარემოსდაცვითი ზედამხედველობის დეპარტამენტის თანამშრომლებთან ერთად, სახელმწიფო ტყის ტერიტორიაზე,   დაურეგისტრირებული სახერხი საამქროების 4 ფაქტი -  სამცხე-ჯავახეთში, იმერეთში, ქვემო ქართლსა და მცხეთა-მთიანეთში გამოავლინეს.  შედგენილია შესაბამისი დოკუმენტაცია, სახერხი საამქროები დაილუქა, ხოლო მიმდებარე ტერიტორიებიდან ამოღებული  24,729  კუბური მეტრი სამასალე და 26,387 კუბური მეტრი  საშეშე მერქანი  „საქმიან ეზოებში“ დასაწყობდა. ვინაიდან საქმე  შეიცავს სისხლის სამართლის დანაშაულის ნიშნებს, მასალები შემდგომი რეაგირებისთვის, გადაიგზავნა შესაბამის უწყებებში.აღსანიშნავია, რომ 2024 წლის იანვრიდან ივნისის ჩათვლით,  ეროვნული სატყეო სააგენტოს თანამშრომლების მიერ, ჯამში, ქვეყნის მასშტაბით ხე-ტყის უკანონო მოპოვებისა და ტრანსპორტირების 436 ფაქტია გამოვლენილი; „საქმიან ეზოებში“ დასაწყობებული რესურსის მოცულობამ 355,91  კუბური მეტრი შეადგინა.

იხილეთ სრულად

სიახლეები

პროექტები